Anwar Anjum
mahv-e-zari to rakha dil ki lagi ne shab-bhar
lekin aansu bhi jo ponchhe to usi ne shab-bhar
ye mire dil ki chamak hai ki tiri aankh ka nuur
zehn men nachte rahte hain nagine shab-bhar
ruhen dam-saz hain to jism bhi hamraz banen
yuun to taḌpenge ye jalte hue siine shab-bhar
ajnabi jaan ke Darte rahe sab darvaze
meri avaz na pahchani kisi ne shab-bhar
dil ke betab samundar men tamanna ban kar
Dubte tairte rahte hain safine shab-bhar
us ke bam-falak-asar ki tasvir men gum
meri taḳh.il banati rahi ziine shab-bhar
jahan bedariyan baiThi hain muhafiz ban kar
ham ne ḳhvabon men nikale vo dafine shab-bhar
aankh uTha kar bhi nahin dekhta ab din men jise
kitna bechain rakha mujh ko usi ne shab-bhar
sher hi kahiye ki shayad mile taskin ‘anjum’
yuun to ye chandni degi nahin jiine shab-bhar
Leave a Reply