deti nahin amaan jo zamin asman to hai
kahne ko apne dil se koi dastan to hai
yuun to hai rang zard magar hont laal hain
sahra ki vusaton men kahin gulsitan to hai
ik chiil ek mumti pe baithi hai dhuup men
galiyan ujad gai hain magar pasban to hai
avaz de ke dekh lo shayad vo mil hi jaae
varna ye umr bhar ka safar raegan to hai
mujh se bahut qarib hai tu phir bhi ai ‘munir’
parda sa koi mere tire darmiyan to hai