guzarna rahguzaron se baḌa asan tha pahle
ilaqa ham jahan rahte hain vo sunsan tha pahle
sabab kya hai use khone ka kuchh bhi gham nahin hota
jise paane ka is dil ko baḌa arman tha pahle
ye aalam hai ki ab kuchh bhi nahin ik hu ka aalam hai
hamare ḳhana-e-dil men koi mehman tha pahle
bashar ka shar numayan ho gaya daur-e-taraqqi men
yahi vo aadmi hai jo kabhi insan tha pahle
ajab ḳhushbu si aati hai dar-o-divar se ab bhi
yahan koi yaqinan sahib-e-iman tha pahle
vo mere vaste ab jaan dene par hai amada
vahi ‘javed’ jo mera harif-e-jan tha pahle
Leave a Reply