Adnan Mohsin
ism ban kar tire honton se phisalta hua main
barf-zaron men utar aaya huun jalta hua main
us ne paimane ko ankhon ke barabar rakkha
us ko achchha nahin lagta tha sambhalta hua main
raat ke pichhle pahar chand se kuchh kam to na tha
din ki surat tiri banhon se nikalta hua main
tere pahlu men zara der ko susta lunga
tujh tak aa pahuncha agar niind men chalta hua main
meri rag rag men lahu ban ke machalti hui tu
teri sanson ki hararat se pighalta hua main
vo kabhi dhuup nazar aae kabhi dhund lage
dekhta huun use har rang badalta hua main
Leave a Reply