Faza Ibn E Faizi
bahut jumud tha be-hauslon men kya karta
na lagti aag to main jangalon men kya karta
ik imtihan-e-vafa hai ye umr bhar ka azaab
khaḌa na rahta agar zalzalon men kya karta
ho chob giili to aḳhir jala.e kaun us ko
main tujh ko yaad bujhe valvalon men kya karta
miri tamam hararat zamin ka virsa hai
ye aftab tire badalon men kya karta
ab is qadar bhi taraf-dar main nahin us ka
himayat us ki ghalat-faislon men kya karta
ye log vo hain jo be-jurm sangsar hue
harif rah ke tire manchalon men kya karta
main us ke chehre ki rangat nahin jo uḌ na sakun
sameT kar vo mujhe anchalon men kya karta
adab se rabta danish ka janta hi nahin
ulajh ke vo bhi mire mas.alon men kya karta
na raas aa.i kabhi mujh ko bazm-e-kam-nazaran
‘faza’ bhi baiTh ke in pagalon men kya karta
Leave a Reply