kisi se aur to kya guftugu karen dil ki
ki raat sun na sake ham bhi dhaḌkanen dil ki
magar ye baat ḳhirad ki samajh men aa na saki
visal-o-hijr se aage hain manzilen dil ki
jilau men ḳhvab-numa rat-jage saja.e hue
kahan kahan liye phirti hain vahshaten dil ki
nigah milte hi rang-e-haya ki surat hain
chhalak uThin tire ruḳh se latafaten dil ki
nigah-e-kam bhi use sang se ziyada hai
ki aa.ine se siva hain nazakaten dil ki
dayar-e-harf-o-nava men koi to aisa ho
kabhi kisi se to ham baat kar saken dil ki
sar-e-jarida-e-hasti hamare baad ‘umid’
lahu se kaun likhega ibaraten dil ki
Leave a Reply