Ifa-E-Wada Aap Se Ai Yar Ho Chuka

ifa-e-vaada aap se ai yaar ho chuka

us ka to imtihan kai baar ho chuka

ahbab haath uthaen hamare ilaaj se

sehat-pazir ishq ka bimar ho chuka

vo be-hisab bakhsh de ye baat aur hai

apne hisab men to gunahgar ho chuka

main haath jodta huun badi der se huzur

lag jaiye gale se ab inkar ho chuka

bechun kahan main apne dil-e-dagh-dar ko

sauda bura pasand kharidar ho chuka

piiri men parvarish hai abas jism-e-zar ki

phenkun kisi ghadi main ye bekar ho chuka

barham vo shokh kyuun na ho kyuun zulf ko chhua

ye haath hathkadi ke saza-var ho chuka

ab mujh se iltiyam ki baten na kijiye

dil tum se phat gaya jigar afgar ho chuka

mujh dil-figar ko na rahi tum se kuchh umiid

ye khatt-e-sabz marham-e-zangar ho chuka

darban ko salam karen ghar ki raah len

vo munh chhupa ke baithe hain didar ho chuka

bande ke haal par nazar-parvarish rahe

husn-e-malih ka main namak-khvar ho chuka

luun bosa khun-baha main us abru-kaman se

ab to jigar se tir-e-nigah paar ho chuka

ai ‘bahr’ ab to baat bhi karta nahin vo shokh

vo rasm-o-rah ho chuki vo pyaar ho chuka

Leave a Comment