na apne zabt ko rusva karo sata ke mujhe
ḳhuda ke vaste dekho na muskura ke mujhe
siva.e daagh mila kya chaman men aa ke mujhe
qafas nasib hua ashiyan bana ke mujhe
adab hai main jo jhuka.e hue huun aankh apni
ghazab hai tum jo na dekho nazar uTha ke mujhe
ilahi kuchh to ho asan naza.a ki mushkil
dam-e-aḳhir to taskin de vo aa ke mujhe
ḳhuda ki shaan hai main jin ko dost rakhta tha
vo dekhte bhi nahin ab nazar uTha ke mujhe
miri qasam hai tumhen rahravan-e-mulk-e-adam
ḳhuda ke vaste tum bhulna na ja ke mujhe
hamara kaun Thikana hai ham to ‘bismil’ hain
na apne aap ko rusva karo sata ke mujhe
Leave a Reply