ahmad-adil

Nishan Manzil Ka Batlaya Na Mujhko Ham-Safar Jaana

nishan manzil ka batlaya na mujh ko ham-safar jaana

tazabzub men pada hai vo jise main ne khizar jaana

nazar meri basirat ko sada mahdud rakhti hai

pas-e-manzar nahin dekha faqat pesh-e-nazar jaana

jahan taqdir le jaae vahan raste nahin jaate

kiya tha rukh idhar ka kyuun likha tha jab udhar jaana

havala zindagi ka bhi tumhari zulf jaisa hai

bikharna phir sanvar jaana sanvarna phir bikhar jaana

junun ki raah ko ab tak samajh paae nahin sahab

ki apne jism ko Dha kar faqat jaan se guzar jaana

Duboya jis ne kashti ko use hi na-khuda samjhe

diye the jis ne saare dukh usi ko charagar jaana

unhin tarik rahon se guzarna hai tumhen ‘adil’

charagh-e-jan jala kar tum bila khauf-o-khatar jaana

More Poems

Leave a Comment