Ho Chuki Hijrat to Phir Kya Farz Hai Ghar Dekhna

Zafar Kaleem

ho chuki hijrat to phir kya farz hai ghar dekhna

apni fitrat men nahin pichhe palaT kar dekhna

ab vo bargad hai na vo panghaT na ab vo gopiyan

aise pas-manzar men kya gaanv ka manzar dekhna

jada-e-gul ki masafat hi nahin hai zindagi

zindagi karna hai angaron pe chal kar dekhna

apne muḳhlis doston par vaar main kaise karun

koi dushman samne aa.e to jauhar dekhna

pyaas honTon par liye baiTha huun sahil par magar

zid pe aa ja.un to kuuze men samundar dekhna

khiḌkiyan khulte hi ham honge nishana vaqt ka

zaḳhm siine par sajana ho to bahar dekhna

mere hathon ki lakiron men hai gardish vaqt ki

meri qismat hi men likkha tha ye chakkar dekhna

zindagi bhar Thokaren khane se behtar hai ‘zafar’

rasta chalte hue raste ke patthar dekhna