itne to ham-ḳhayal dil-e-mubtala hain ham
kal jis se ḳhush the aaj isi se ḳhafa hain ham
tujh se juda nahin hain jo tujh se juda hain ham
tere hi hain agarche tire naqsh-e-pa hain ham
kahte hain ham ko nek bhi bad bhi hazar-ha
is ki ḳhabar nahin hai ki dar-asl kya hain ham
rutba baḌha diya hai junun-e-firaq ne
ham se juda hain aap to sab se juda hain ham
tasir-e-ashk-o-ah ne badla nahin mizaj
muddat hui ki shaki-e-ab-o-hava hain ham
lakhon jafa.en sah ke ab aaya hai ye ḳhayal
milte hi kyuun hain us se jo be-mudda.a hain ham
vo yaas ban ga.i jo zamane ki aas thi
azurda aaj apne se be-intiha hain ham
jamta hai apne zikr se ab mahfilon ka rang
rahte hain apne ghar men magar ja-ba-ja hain ham
kya kya inayaten hain bas ai charḳh-e-pir bas
tera tasadduq ab bhi kisi se juda hain ham
ab ittifaq-e-ahl-e-vafa tum ko kya dikha.en
mahshar men dekhna ki ye sab ek ja hain
manzur imtihan-e-dil-e-ishq-baz hai
ab apne vaste bhi to sabr-azma hain ham
is par miTe hue hain miTata hai jo safi’
dushman ki ga rahe hain baḌe ḳhush-nava hain ham
Leave a Reply