aḳhiri ummid bhi ankhon se chhalkae hue
kaun si janib chale hain tere Thukrae hue
apni galiyan apni basti bhuul baiTha hai vo chand
ek yug guzra hai us ko nuur barsae hue
justuju vaale tumhari raah men mar miT gae
ek muddat se tumhen pardes hain bhaae hue
ai bahar-e-zindagi ab der hai kis baat ki
baasi phulon ki tarah hain baḳht murjhae hue
duur ja nikla kahin suraj hamare shahr ka
raat bhagi aa rahi hai shaam ke saae hue
but bana baiTha raha ‘hasrat’ huzur-e-husn men
kah gae apni zaban men ashk tharrae hue
Leave a Reply