fasil-e-dard ko mismar karne vaali huun
main ansuon ki nadi paar karne vaali huun
mujhe ḳhuda ki raza se hai vasta har dam
main ḳhud-numa.i se inkar karne vaali huun
ye us ki marzi ki iqrar vo kare na kare
main aaj ḳhvahish-e-iz.har karne vaali huun
vo jis ne ki hai hamesha muḳhalifat meri
usi ko apna madad-gar karne vaali huun
vafa ki raah men ḳhud ko tabah kar ke main
tamam shahr ko bedar karne vaali huun
koi na Daale nigah-e-ghalat ki main apne
nihatte hathon ko talvar karne vaali huun
Leave a Reply