ḳhauf aata hi nahin ab to mujhe paani se
is liye jhiil men utri huun main asani se
kaun tha kis ki juda.i ka tujhe sadma hai
aaj puchhungi yahi shahr ki virani se
tu bhi rahta hai mire samne sharminda sa
main bhi nadim huun tiri roz ki nadani se
maut bhi Duub ke honi hai hamari shayad
Dar jo lagta hi nahin hai hamen tughyani se
ḳhud-numa.i ka use shauq hai kitna ‘zebi’
apni tasvir hai banva.i kisi maani se
Leave a Reply