rah-e-vafa men luuTa gaya dil
hai hai mira dil bekas mira dil
roz-e-azal yuun paida hua dil
li gham ne karvaT aur ban gaya dil
har dushman-e-jan ahl-e-vafa hai
ik ba-vafa tum ik ba-vafa dil
dil ji raha hai gham ke sahare
jab miT gaya gham samjho miTa dil
tum dil men ho ya tasvir-e-hairat
tasvir-e-hairat ya hai mira dil
sunsan mahfil viran pahlu
ruḳhsat hue tum ruḳhsat hua dil
TuuTa na aḳhir sadme se ‘mani’
shishe se bhi tha nazuk mira dil
Leave a Reply