apni kaifiyyaten har aan badalti hui shaam
munjamid hoti hui aur pighalti hui shaam
dagmagati hui har-gam sambhalti hui shaam
khvab-gahon se udhar khvab men chalti hui shaam
gundh kar motiye ke haar ghani zulfon men
ariz-o-lab pe shafaq surkhiyan malti hui shaam
ik jhalak poshish-e-be-zabt se uryani ki
de gai din ke nashebon se phisalti hui shaam
ek sannata rag-o-pai men sada gunjta hai
bujh gai jaise lahu men koi jalti hui shaam
vaqt baptisma kare ab-e-sitara se use
dast-e-duniya ki darazi se nikalti hui shaam
Leave a Reply