ahmad-ali-barqi-azmi

Aawaz Ka Uski Zer-O-Bam Kuchh Yaad Raha Kuchh Bhul Gae

avaz ka us ki zer-o-bam kuchh yaad raha kuchh bhuul gae

kitna dilkash tha mera sanam kuchh yaad raha kuchh bhuul gae

kis darja hasin tha vo lamha jo qissa-e-parina hai ab

jab us ki nazar men the bas ham kuchh yaad raha kuchh bhuul gae

go aise lamhe kam aae lekin hain vo mera sarmaya

kab kab vo hua mail-ba-karam kuchh yaad raha kuchh bhuul gae

vo ruthne aur manane ka ehsas abhi tak baaqi hai

kya kya the us ke qaul-o-qasam kuchh yaad raha kuchh bhuul gae

vo khvab dikhata tha mujh ko main is pe bharosa karta tha

qaaim na raha vaadon ka bharam kuchh yaad raha kuchh bhuul gae

aae ho abhi jaate ho kahan is ka ye kahna abhi aaya

kar dena miri phir naak men dam kuchh yaad raha kuchh bhuul gae

ye bhuli-bisri yaden hain sarmaya-e-zist mira ‘barqi’

kis tarah karun men is ko raqam kuchh yaad raha kuchh bhuul gae

More Poems

Leave a Comment