dasht men uḌte bagulon ki ye masti ek din
ek din hai sar-bulandi aur pasti ek din
ek din tu bhi isi bazar men bik ja.ega
aur koi shai na hogi tujh se sasti ek din
naqsh jitne hain baha le ja.enge ashk-e-ravan
aur rah ja.engi ye ankhen tarasti ek din
rafta rafta ye dhundalke aur baḌhte ja.enge
yak-ba-yak viran ho ja.egi basti ek din
ek din jal ja.unga main bhi chita ki aag men
ḳhaak men mil ja.egi teri bhi hasti ek din
do dinon ki zindagani kufr kya islam kya
ek din ka.abe men sajda but-parasti ek din
gar yuun hi ghalib raha ham par suḳhan ka qarz ye
”rang la.egi hamari faqa-masti ek din”
Leave a Reply