ḳhayal-o-ḳhvab ke dariya ke paar asar bhi ga.e
jidhar hamen nahin jaana tha ham udhar bhi ga.e
badan se lipTe rahe be-zaminiyon ke azaab
talash-e-rizq ki ḳhatir jidhar jidhar bhi ga.e
jo chahte the sitaron se teri maang bhare
unhen talash na kar ab vo log mar bhi ga.e
ab un ki yadon se ankhon ko aur surḳh na kar
vo hadse to zamana hua guzar bhi ga.e
vo saare ḳhvab-zada log apne ḳhvab ke saath
sanvarte rahne ke imkan men bikhar bhi ga.e
nazar men rang the ara.ish-e-makan ke magar
hava kuchh aisi chali ghar ke bam-o-dar bhi ga.e
Leave a Reply