Waheed Akhtar
rahe vo zikr jo lab-ha-e-atishin se chale
chale vo duur jo raftar-e-satgin se chale
hazaron saal safar kar ke phir vahin pahunche
bahut zamana hua tha hamen zamin se chale
ḳhirad bani rahi zanjir-e-pa-e-shauq magar
junun ke jitne bhi hain silsile hamin se chale
furat jiit ke bhi tishna-lab rahi ghairat
hazar tir-e-sitam zulm ki kamin se chale
zamana ek hi raste pe la ke chhoḌega
ravan hai ek hi dhara koi kahin se chale
guman-o-shak ke do-rahe pe ham se aa ke mile
vo qafile jo kisi manzil-e-yaqin se chale
hamen shikast-e-harifan ka bhi malal raha
shikasta-dil jo ham us bazm-e-dil-nashin se chale
tamam gumrahiyan dair aur haram men palin
tamam silsila-e-kufr ahl-e-din se chale
‘vahid’ sail-e-qayamat ne raah roki thi
jo ban ke ashk ham us chashm-e-naznin se chale
Leave a Reply