main ne puchha pahla patthar mujh par kaun uTha.ega
aa.i ik avaz ki tu jis ka mohsin kahla.ega
puchh sake to puchhe koi ruuTh ke jaane valon se
raushniyon ko mere ghar ka rasta kaun bata.ega
Daali hai is ḳhush-fahmi ne aadat mujh ko sone ki
niklega jab suraj to ḳhud mujh ko aan jaga.ega
logo mere saath chalo tum jo kuchh hai vo aage hai
pichhe muḌ kar dekhne vaala patthar ka ho ja.ega
din men hans kar milne vaale chehre saaf batate hain
ek bhayanak sapna mujh ko saari raat Dara.ega
mere ba.ad vafa ka dhoka aur kisi se mat karna
gaali degi duniya tujh ko sar mera jhuk ja.ega
suukh ga.i jab ankhon men pyaar ki niili jhiil ‘qatil’
tere dard ka zard samundar kaahe shor macha.ega
Leave a Reply