ḳhuub andaz-e-pazira.i hai
izzat-e-nafs pe ban aa.i hai
gham-e-dauran gham-e-janan gham-e-jan
meri in sab se shanasa.i hai
haath phailaya hai apne aage
ye gada.i hai ki dara.i hai
dil ke a.ine men ye tu hai ki main
ek surat si nazar aa.i hai
tajraba ye hai ki har zulf-e-ḳhirad
dast-e-vahshat hi ne suljha.i hai
dil ko iflas ka ehsas nahin
kaisi daulat mire haath aa.i hai
husn-e-mahsus jise kahte hain
mere ehsas ki ra.ana.i hai
ai bahar-e-lab-o-ariz ye bata
tu kisi ko kabhi raas aa.i hai
vaqt hai dar-pa-e-azar magar
‘lais’ ko zo.am-e-shakeba.i hai
Leave a Reply