sahra base hue the hamari nigah men
ḳhema laga na paa.e ham ab-o-giyah men
sadiyan hamari raah ko roke khaḌi rahin
aur zindagi guzarti rahi sal-o-mah men
bas jaate ham kahin bhi samundar ke darmiyan
aaya magar na koi jazira hi raah men
ik baar haath lag ga.e us andhi bhiiḌ ke
vapas na lauT paa.e ham apni panah men
vaqt aur maqam se na kabhi ham guzar sake
guzre maqam-o-vaqt faqat rasm-o-rah men
kuchh der zer-e-pa jo Thaharti koi zamin
ham bhi qayam karte kisi ja.e-gah men
‘betab’ pastiyon se nikal hi na paa.e ham
kya kya bulandiyan thiin hamari nigah men
Leave a Reply