Shahnaz Parveen Sahar
chhoTi si ik uḌaan bhari aur bikhar gaya
chiḌiya ka boT pankhe se Takra ke mar gaya
sarma ki chandni thi javani guzar ga.i
jhulsa rahi hai dhuup buḌhapa Thahar gaya
ta-sub.h jhilmila.i mire ansuon men shab
bujhta hua charagh sitaron se bhar gaya
panhariyon ne gagaron men niir bhar liye
chaḌhti nadi ka mast bahav utar gaya
avaz ki nami thi jo lafzon tak aa ga.i
ik ghunT ansuon ka gale men Thahar gaya
hairat ki murti bani main dekhti rahi
vo apne ghar ko chhoḌ ke aage guzar gaya
main raftagan ki baat pe be-saḳhta hansi
anjam is hansi ka bhi afsurda-tar gaya
ḳhali gali men saare makan sochte rahe
kis samt is ko aana tha aur kis nagar gaya
ik ham-safar jo mere ḳharabe men saath tha
sochon men ji raha hai magar dil men mar gaya
chunari talash karne men kuchh der ho ga.i
dar par khaḌa hua tha jo ik ḳhvab mar gaya
Leave a Reply