Saurabh Shekhar
yaqin mar gaya mira guman bhi nahin bacha
kahin kisi ḳhayal ka nishan bhi nahin bacha
ḳhamoshiyan tamam gharq ho ga.iin ḳhalaon men
vo zalzala tha sahibo bayan bhi nahin bacha
nadi ke sar pe jaise intiqam sa savar tha
ki bandh fasl pul bahe makan bhi nahin bacha
hujum se nikal ke bach gaya udhar vo aadmi
idhar hujum ke main darmiyan bhi nahin bacha
zamin darak ga.i sulagti bastiyon ki aag se
ghubar vo uTha ki asman bhi nahin bacha
bikharti-TuTti fasil niiv ko hila ga.i
ki daagh zaat par tha ḳhandan bhi nahin bacha
tamam mushkilon ko ham ne niind men daba diya
khula ye phir ki koi imtihan bhi nahin bacha
Leave a Reply