qurbat ke un dinon men bhi jaana paḌa mujhe
ankhon se apni raaz chhupana paḌa mujhe
dil ko to main ne jhuTh se bahla liya magar
thoḌa bahut to shor machana paḌa mujhe
vo chahta tha khelna mere hi jism se
phir darmiyan ishq ke aana paḌa mujhe
us ko tha shauq beach samundar men marne ka
sahil ko khinch khinch ke laana paḌa mujhe
be-rang karni thi mujhe apni ye zindagi
so sha.iri men rang girana paḌa mujhe
us ka ye manna tha ki main us se baḌh ke huun
kar ke tabah ḳhud ko ghaTana paḌa mujhe
tu ban raha ḳhuda hai to ye bhi hisab de
kitna bigaḌ kar ke banana paḌa mujhe
is sher ko sunana tha us shaḳhs ko mujhe
mahfil men aap ki ye sunana paḌa mujhe
Leave a Reply