sanson men mil ga.i tiri sanson ki baas thi
bahki hui nazar thi ki phir bhi udaas thi
be-shak shikast-e-dil pe vo mab.hut rah gaya
lekin shikast-e-dil men bhi zinda ik aas thi
gar tu mire havas pe chhaya hua na tha
hasti vo kaun thi jo mire dil ke paas thi
barish se asman ka chehra to dhul gaya
dharti ke honT par abhi sadiyon ki pyaas thi
konpal ne aankh kholi to hairan rah ga.i
hadd-e-nazar talak ye zamin be-libas thi
honTon pe ik gulab tha taaza khila hua
ankhon ke a.inon men tamanna udaas thi
‘anvar’-sadid sochta rahta huun in dinon
vo kaun tha ki jis ke liye dil men pyaas thi
Leave a Reply