mard-e-maidan ho to kyon katra rahe ho jang se
kab talak ḳhar-mastiyan yunhi rabab-o-chang se
be-hisi oḌhe hue kab tak yuun hi zillat sahen
koi to avaz uTha.e ik na.e ahang se
ho basera ḳhaak par daa.im tira misl-e-malang
joḌ mat rishta tu apni zaat ka aurang se
ho tira aḳhlaq bar buniyad-e-ijz-o-inkisar
adamiyat rakh bacha kar nafraton ke zang se
mat dalilen pesh kar kotahiyon par is tarah
ba.is-e-ta.azir Thahrega tu uzr-e-lang se
ponchh de gard-e-taghaful toḌ tar-e-ankabut
naqsh raushan hon tiri tasvir ke arzang se
aankh men afvaj ḳhvabon ki utaren mustaqil
aur ta.abiren uTha.en zindagi ki jang se
Leave a Reply