jo charagh saare bujha chuke unhen intizar kahan raha
ye sukun ka daur-e-shadid hai koi be-qarar kahan raha
jo dua ko haath uthae bhi to murad yaad na aa saki
kisi karvan ka jo zikr tha vo pas-e-ghubar kahan raha
ye tulu-e-roz-e-malal hai so gila bhi kis se karenge ham
koi dilruba koi dil-shikan koi dil-figar kahan raha
koi baat khvab-o-khayal ki jo karo to vaqt katega ab
hamen mausamon ke mizaj par koi e’tibar kahan raha
hamen ku-ba-ku jo liye phiri kisi naqsh-e-pa ki talash thi
koi aftab tha zau-fagan sar-e-rahguzar kahan raha
magar ek dhun to lagi rahi na ye dil dukha na gila hua
ki nigah ko rang-e-bahar par koi ikhtiyar kahan raha
sar-e-dasht hi raha tishna-lab jise zindagi ki talash thi
jise zindagi ki talash thi lab-e-juebar kahan raha
Leave a Reply