Ameer Qazalbash
kahin salib kahin karbala nazar aa.e
jidhar nigah uThe zaḳhm sa nazar aa.e
bujhi hai pyaas zamin ki to ye tapish kyuun hai
vo abr hai to barasta hua nazar aa.e
baja hai apni aqidat magar saval ye hai
vo aadmi ho to kyunkar ḳhuda nazar aa.e
chalo ki gher len us ko lahu lahu chehre
har ek samt use aa.ina nazar aa.e
hamin ne tan se juda kar liya hai sar apna
bas ek ham the jo sab se juda nazar aa.e
kahan kahan abhi imkan-e-zindagi hai ‘amir’
dhuan chhaTe to koi rasta nazar aa.e
Leave a Reply