bhiiḌ men ik ajnabi ka samna achchha laga
sab se chhup kar vo kisi ka dekhna achchha laga
surma.i ankhon ke niche phuul se khilne lage
kahte kahte kuchh kisi ka sochna achchha laga
baat to kuchh bhi nahin thiin lekin us ka ek dam
haath ko honTon pe rakh kar rokna achchha laga
chaa.e men chini milana us ghaḌi bhaya bahut
zer-e-lab vo muskurata shukriya achchha laga
dil men kitne ahd bandhe the bhulane ke use
vo mila to sab irade toḌna achchha laga
be-irada lams ki vo sansani pyari lagi
kam tavajjoh aankh ka vo dekhna achchha laga
nim-shab ki ḳhamoshi men bhigti saḌkon pe kal
teri yadon ke jilau men ghumna achchha laga
is adu-e-jan ko ‘amjad’ main bura kaise kahun
jab bhi aaya samne vo bevafa achchha laga
Leave a Reply