Aaj Shayad Zindagi Ka Falsafa Samjha Hun Main

Salim Shuja Ansari

aaj shayad zindagi ka falsafa samjha huun main

huun zarurat zindagi ki is liye zinda huun main

hai miri taḳhliq men unsur baghavat ka koi

jis jagah pabandiyan thiin us jagah pahuncha huun main

ik ajab sa hai ta.alluq us ke mere darmiyan

aisa lagta hai ki us ki zaat ka hissa huun main

hain numayan jis ke chehre par haqiqat ke nuqush

tere shahr-e-ḳhvab men vo aadmi tanha huun main

chha gaya huun ḳhauf ban kar apne hi a.asab par

aur kabhi be-ḳhauf ho kar ḳhauf se nikla huun main

hain zamin par har taraf mere hi qadmon ke nishan

roz-e-avval se hi ‘salim’ koi avara huun main