sabza-e-ḳhat hai payambar ruḳh hai qur.an-e-bahar
tu hai qibla tu hai ka.aba tu hai iman-e-bahar
mere rone se hui fasl gulistan-e-bahar
ho gaya mizab-dida miir saman-e-bahar
sarv ko jogi samajh kar faal khulvane lagi
kya ḳhizan men rahte hain bulbul ko arman-e-bahar
shaḳh-e-gul jumbish kahan karte hain matvalon ki tarah
bulbulon ke bose le lete hain mastan-e-bahar
hijr-e-be-ummid-e-vaslat men koi jiina bhi hai
bulbulon ke hote hain kuchh ahd-e-paiman-e-bahar
sarv ke misre ke ma.ani bulbulon se puchh lo
andalibon se suno sharh-e-gulistan-e-bahar
zulf-e-gul ro ke gale mil kar jo aa.egi ‘nasim’
hogi sumbul af.i-e-ganj-e-shahidan-e-bahar
Leave a Reply