Sehr Ishqabadi
tira vahshi kuchh aage hai junun-e-fitna-saman se
kahin dast-o-gareban ho na abadi bayaban se
ilahi jazba-e-dil ka asar itna na ho un par
pareshan vo na ho jaa.en mire hal-e-pareshan se
qayamat hai vo aa.e aur aate hi hue vapas
ye asar-e-sahar paida hue sham-e-ghariban se
nazar vaale samajh jaa.en na arsh-o-farsh ki nisbat
tira daman na chhu jaa.e kahin mere gareban se
uruj-e-josh-e-vahshat ‘sehr’ hai ye roz-e-raushan men
nazar aate hain taare rauzan-e-divar-e-zindan se
Leave a Reply