Nasir Kazmi
ishq jab zamzama-paira hoga
husn khud mahv-e-tamasha hoga
sun ke avaza-e-zanjir-e-saba
qafas-e-ghuncha ka dar va hoga
jaras-e-shauq agar saath rahi
har-nafas shapar-e-anqa hoga
daaim abad rahegi duniya
ham na honge koi ham sa hoga
kaun dekhega tulu-e-khurshi
zarra jab dida-e-bina hoga
ham tujhe bhuul ke khush baithe hain
ham sa bedard koi kya hoga
phir sulagne laga sahra-e-khayal
abr ghir kar kahin barsa hoga
phir kisi dhyan ke sad-rahe par
dil-e-hairat-zada tanha hoga
phir kisi subh-e-tarab ka jaadu
parda-e-shab se huvaida hoga
gul-zaminon ke khunuk ramnon men
jashn-e-ramish-gari barpa hoga
phir nai rut ka ishara pa kar
vo saman-bu chaman-ara hoga
gul-shab-tab ki khushbu le kar
ablaq-e-subh ravana hoga
phir sar-e-shakh-e-shua-e-khurshid
nikhat-e-gul ka basera hoga
ik sada sang men tadpi hogi
ik sharar phuul men larza hoga
tujh ko har phuul men uryan sote
chandni-rat ne dekha hoga
dekh kar aina-e-ab-e-ravan
patta patta lab-e-goya hoga
shaam se soch raha huun ‘nasir’
chand kis shahr men utra hoga
Leave a Reply