poet

Kuchh Kahun Kahna Jo Mera Kijiye

kuchh kahun kahna jo mera kijiye

chahne vaale ko chaha kijiye

hausla tegh-e-jafa ka rah na jaae

aaiye khun-e-tamanna kijiye

fitna-e-roz-e-qayamat hai vo chaal

aaj vo aate hain dekha kijiye

kis ko dekha un ki surat dekh kar

ji men aata hai ki sajda kijiye

fitne sab barpa kiye hain husn ne

meri ulfat ko na rusva kijiye

hur-e-jannat un se kuchh badh kar sahi

ek dil kya kya tamanna kijiye

kar diya hairat ne mujh ko aaina

be-takalluf munh dikhaya kijiye

josh men aa jaae rahmat ki tarah

ek ik qatre ko dariya kijiye

naam agar darkar hai misl-e-nagin

ek ghar men jam ke baitha kijiye

mil chuke ab milne vaale khaak ke

qabr par ja ja ke roya kijiye

kaun tha kal bais-e-be-pardagi

aap mujh se aaj parda kijiye

kal ki baton men to kuchh narmi si hai

aaj phir qasid ravana kijiye

raah takte takte ‘asi’ chal basa

kyuun kisi se aap vaada kijiye

More Poems

Leave a Comment