Mohammad Ahmad Ramz
ab vo moḌ aaya ki har pal mo’atabar hone ko hai
dekhna manzar naya divar dar hone ko hai
ab lahu ka rang gahra hai miri tasvir men
aisa lagta hai ki qissa muḳhtasar hone ko hai
uḌ chali hai har taraf daman men bhar lene ki baat
qatra qatra us ke dariya ka guhar hone ko hai
main bhi dekhun mujh ko manzar se haTa dene ke ba.ad
ab tamasha kaun sa bar-e-digar hone ko hai
phir tarashi jaane vaali hain charaghon ki laven
shaam hote hote garm aisi ḳhabar hone ko hai
muḌ ke dekhun to aqab men kuchh nazar aata nahin
samne bhi gum nishan-e-rah-guzar hone ko hai
ab na.i rahen khulengi mujh par imkanat ki
‘ramz’ mere tan pe zahir mera sar hone ko hai
Leave a Reply