ḳhvab-e-didar na dekha ham ne
gha.ebana unhen chaha ham ne
kam na tha ishq azal se rusva
kar diya aur bhi rusva ham ne
zindagi mahv-e-ḳhud-ara.i thi
aankh uTha kar bhi na dekha ham ne
raah se duur nazar aa.e jo ḳhaar
un ko palkon se uThaya ham ne
le liya koh-e-havadis sar par
vaqt ke dil ko na toḌa ham ne
kar diya faash tira gham le kar
raz-e-ejaz-e-masiha ham ne
koh sangin haqa.eq tha jahan
husn ka ḳhvab tarasha ham ne
dard aluda-e-darman tha ‘ravish’
dard ko dard banaya ham ne
Leave a Reply