zabt ki had se guzar kar ḳhaar to hona hi tha
shiddat-e-gham ka magar iz.har to hona hi tha
aa.ine kab tak salamat rahte shahr-e-sang men
ek din patthar koi bedar to hona hi tha
ḳhaak men milna hi tha ik din ghurur-e-zindagi
ret ki divar ko mismar to hona hi tha
kis tarah karte nazar-andaz apne aap ko
ik na ik din zindagi se pyaar to hona hi tha
koi amada na tha rahen badalne ke liye
rasta millat ka phir dushvar to hona hi tha
jis taraf dekha udhar apne hi the ḳhanjar-ba-kaf
phir mire isar ko talvar to hona hi tha
ḳhvahishen be-rabt thiin be-zauq tha dast-e-talab
aisi hajat ka sila inkar to hona hi tha
ek din kahna hi tha ik dusre ko alvida.a
aḳhirash ‘salim’ juda ik baar to hona hi tha
Leave a Reply