khush nahin aae bayaban miri virani ko
ghar bada chahiye is be-sar-o-samani ko
dhaal duun chashma-e-pur-harf ko aine men
apni avaz men rakh duun tiri hairani ko
jada-e-nur ko thokar pe sajata hua main
dekhta rahta huun rangon ki pur-afshani ko
sar-e-sahra miri ankhon ka talatum jaaga
mauja-e-reg ne sarshar kiya paani ko
sajda-e-naqsh-e-kaf-e-pa-e-nigaran hi to hai
jis ne tabinda rakha hai miri peshani ko
tujh se bhi kab hui tadbir miri vahshat ki
tu bhi mutthi men kahan bhench saka paani ko
sard mausam ne thithurte hue suraj se kaha
chadar-e-abr to hai dhanp le uryani ko
‘shahryar’ apne kharabe pe hukumat hai miri
koi mujh sa ho to samjhe miri sultani ko
Leave a Reply