har ḳhata us ki hamesha darguzar karti hui
faslon ko dil ki chahat muḳhtasar karti hui
zehn-o-dil ki raushni ko tez-tar karti hui
guftugu sidhe tiri dil par asar karti hui
mere jazbon ke fusun men qaid vo hota hua
us ke lahje ki khanak mujh par asar karti hui
zindagi ki tez-gami aur daulat ki havas
aane vaale kal se ham ko be-ḳhabar karti hui
hausla deta hua sa mujh ko mera e’timad
be-yaqini dil men paida Dar pe Dar karti hui
bhola-pan aur sadgi par us ki main miTta hua
ek surat mohni si dil men ghar karti hui
kis ko ye malum ai ‘nayab’ nisbat kis ki hai
mere har naqsh-e-qadam ko mo’atabar karti hui
Leave a Reply