chilchilati dhuup sar par aur tanha aadmi
aah ye ḳhamosh patthar aur tanha aadmi
jis tarah ik barf ke Tiile pe jalti ho chita
ye pighalta mom sa ghar aur tanha aadmi
is hisar-e-ḳhamushi men barsar-e-paikar hain
tez avazon ke lashkar aur tanha aadmi
kya usi ka naam hai ra.ana.i-e-bazm-e-hayat
tang kamra sard bistar aur tanha aadmi
kis tarah abad hogi dil ki suuni ka.enat
Dubte majruh manzar aur tanha aadmi
haa.e un be-kar zehnon ki ghani parchha.iyan
uf ye sannaTe ka ajgar aur tanha aadmi
raat ke nange badan se ḳhvahishon ki chheḌ-chhaḌ
har-ghaḌi anjam ka Dar aur tanha aadmi
Leave a Reply