kitab-e-ishq men saara bayan visal ka hai
main zinda hijr men huun aur guman visal ka hai
ham aise farq-e-ta.alluq se ḳhud bhi hairan hain
zamin hai hijr ki aur asman visal ka hai
ajab tazad ke pesh-e-nazar huun hasti men
hai dhuup hijr ki aur sa.eban visal ka hai
hai jagne pe hi paḌta tamam chabuk-e-hijr
hon ankhen band to saara saman visal ka hai
chalo ye hijr sahi kuchh to dastaras men rahe
jo vaqt aata hai vo bhi kahan visal ka hai
gharaz se chup hain magar ahl-e-dil samajhte hain
ki lafz-e-hijr se raushan-bayan visal ka hai
kashid karte hain irfan apne hijr se ‘tur’
ye ḳhitta chhoḌ ke saara jahan visal ka hai
Leave a Reply