Arsh Siddiqui
azab-e-be-dili-e-jan-e-mubtala na gaya
jo sar pe baar tha andesha-e-saza na gaya
ḳhamosh ham bhi nahin the huzur-e-yar magar
jo kahna chahte the bas vahi kaha na gaya
palaT ke dekhne ki ab to aarzu bhi nahin
thi ashiqi hamen jab ḳhub, vo zamana gaya
rahe musir ki uTha den vo anjuman se hamen
ham uThna chahte bhi the magar uTha na gaya
hamare naam se jab zikr-e-bevafa.i chala
junun men bol paḌe ham se bhi raha na gaya
hamara qissa-e-gham biich men vo chhoḌ uTThe
unhi ki zid thi magar un hi se suna na gaya
zamane bhar ne kaha ‘arsh’ jo, ḳhushi se saha
par ek lafz jo us ne kaha saha na gaya
Leave a Reply