Jabin Ka Chand Banun Aankh Ka Sitara Banun

Farigh Bukhari

jabin ka chand banun aankh ka sitara banun

kisi jamal-e-shafaq-tab ka sahara banun

mohabbaton ki shikaston ka ik ḳharaba huun

ḳhudara mujh ko girao ki main dobara banun

ye bhigi bhigi havaon men sard sard mahak

jo dil ki aag men utre to kuchh gavara banun

har ek ghuncha-dahan ka yahi taqaza hai

jamaliyat ka main aḳhiri shumara banun

zamana manzar-e-mauhum ka hai shaida.i

ye aarzu hai koi daur ka nazara banun

har ek mauj ho uThti javaniyon ki dhanak

banun to aise samundar ka main kinara banun

mujhe lagan ki main a.ine ki misal rahun

use havas ki rivayat-e-sang-e-ḳhara banun

ghazal vo kyuun na ho ‘farigh’ dur-e-adan ki jahan

har ek sher ko zid ho ki shah-para banun