Dard Mein Lazzat Bahut Ashkon Mein Ranai Bahut

Syed Zameer Jafri

dard men lazzat bahut ashkon men ra.ana.i bahut

ai gham-e-hasti hamen duniya pasand aa.i bahut

ho na ho dasht-o-chaman men ik ta.alluq hai zarur

bad-e-sahra.i bhi ḳhushbu men uTha laa.i bahut

maslahat ka jabr aisa tha ki chup rahna paḌa

varna uslub-e-zamana par hansi aa.i bahut

be-saharon ki mohabbat be-navaon ka ḳhulus

aah ye daulat ki insanon ne Thukra.i bahut

be-ḳhayali men bhi kitne fasle tai ho ga.e

be-irada bhi ye duniya duur le aa.i bahut

apni fitrat men bhi raushan honge lekin ai ‘zamir’

meri raton se bhi taron ne chamak paa.i bahut