Raat Ke Pichhle Pahar Jis Ne Jagaya Kya Tha

raat ke pichhle pahar jis ne jagāyā kyā thā

koī āseb-zada hijr kā saaya kyā thā

na to ham samjhe na kī koī vazāhat dil ne

jaane apnā thā ki vo shaḳhs parāyā kyā thā

ye to sach hai ki laboñ ne na koī jumbish keī

par nigāhoñ ne jo paiġhām sunāyā kyā thā

yuuñ samundar kā havā se to koī rabt na thā

lahar ne phir bhī jo ye shor machāyā kyā thā

vo jo ehsās-e-ta.alluq thā ta.alluq ke baġhair

us ne samjhā na kabhī ham ne jatāyā kyā thā

Leave a Comment