hava chali hai na patta koi hila ab tak
vahi hai ek khamoshi ka silsila ab tak
vo kaun log hain kis ki talash men gum hain
hamen to apna pata bhi nahin mila ab tak
tu apne chahne valon se ashna na hui
yahi to tujh se hai ai ziist ik gila ab tak
kisi ka daman-e-sad-chak kya rafu karte
ki ham se apna bhi daman nahin sila ab tak
vahi safar vahi taare vahi thakan baaqi
vahi hai bujhte charaghon ka silsila ab tak
purani baat main kal ki samajh ke bhuul gaya
magar hai zakhm tamanna-e-dil khula ab tak
jise main dhund raha huun gali gali ‘anjum’
vo shakhs mujh se bichhad kar nahin mila ab tak
Leave a Reply