Nazeer Qaisar
gharon men sabza chhaton par gul-e-sahab liye
hava.en phail ga.iin naqsh-o-rang-e-ab liye
shab-e-siyah Dhali sub.h ashkar hui
jabin pe zaḳhm liye haath men gulab liye
main ek Dhalta sa saaya zamin ke qadmon men
tu DhunDne mujhe nikla hai aftab liye
guzar gaya koi pahchanta hua mujh ko
purani yadon ki sham.en pas-e-naqab liye
bikhar ke jaata kahan tak ki main to ḳhushbu tha
hava chali thi mujhe apne ham-rikab liye
ubhar rahe hain ka.i haath shab ke parde se
koi sitara liye koi mahtab liye
hava.en phirti hain raston men baal khole hue
ye raat sar pe khaḌi hai koi azaab liye
ajab nahin kahin ta.abir koi mil jaa.e
bhaTak raha huun girah men hujum-e-ḳhvab liye
Leave a Reply