Poet
vo sirf qisse kahaniyon ke muamle the charagh rakh de
charagh ghisne se koi jin-vin nahin nikalte charagh rakh de
hamari ma.asumiyat to dekho rakh aa.e dil ham huzur-e-janan
ki jaise koi ḳhuda ka banda hava ke aage charagh rakh de
kisi ke saa.e ko qaid karne ka ik tariqa bata raha huun
ik us ke aage charagh rakh de ik us ke pichhe charagh rakh de
tujhe bahut shauq tha mohabbat ki garm lapTon se khelne ka
le jal ga.i na hatheli ab ḳhush kaha tha main ne charagh rakh de
charagh le ke bhi DhunDne se charagh jaisa nahin milega
so rakhni hai to charagh se rakh nahin to pyare charagh rakh de
charagh raushan zarur kar to par is se pahle ḳhuda ki ḳhatir
yahan pe phaila hai jo andhera sameT zer-e-charagh rakh de
main dil ki baton men aa gaya aur uTha ke le aaya us ki paa.el
dimagh deta raha sada.en charagh rakh de charagh rakh de
Leave a Reply